Hverjir urðu sigurvegarar?
Nú er kosningum til Alþingis lokið og segja margir guði sé lof. Eins og allir vita þá hélt ríkisstjórnin velli og þökkuðu einnig margir guði fyrir það. Aftur á móti voru ekki allir jafnánægðir og ef vel var að gáð gat maður greint einstaka blótsyrði hér og þar og sumir hverjir fussuðu og sveiuðu, lái þeim hver sem vill.

Stuðningsmenn sem og flokkarnir hafa keppst við það undanfarna daga að lýsa yfir hverjir voru sigurvegarar í kosningunum og hefur verið heldur hjákátlegt á köflum að fylgjast með þeirri baráttu.

Fyrst skal nefna Frjálslynda flokkinn sem segjast vera sigurvegarar kosninganna. Þeir ginntu allmarga sjómenn til að kjósa sig útá illa unnar og illa undirbúnar tillögur um breytt fiskveiðistjórnunarkerfi þar sem hver sá maður sem kynnti sér tillögurnar af einhverju viti sá að voru ekki traustvekjandi. Þeir spiluðu algerlega frítt spil í kosningabaráttunni, þeir þurftu ekki að bera ábyrgð á einu né neinu og lofuðu öllu fögru, svipuð taktík og bakarinn beitti í síðustu bæjarstjórnarkosningum og við sjáum í dag hvernig það fór. Í kappræðum komust Frjálslyndir upp með það á ótrúlegan hátt, að tala í hringi og geta ekki svarað gríðarlega mikilvægum spurningum sem snertu fiskveiðistjórnunartillögur þeirra. “Hvað ætliði að hafa marga sóknardaga á ári, Guðjón fyrir þessi skip?” Ekkert kom svar frekar en endranær heldur var barið í borðið og krafist breytinga. Jújú það er ekki hægt að neita því að þeir ginkeyptu margan sjómanninn sem féll fyrir þessum baráttuanda og þrátt fyrir mjög svo vafasamar aðferðir á köflum og engan veginn traustvekjandi, er í sjálfu sér ekki hægt annað en að hrósa þeim fyrir það hvernig þeir stóðu að málum. Eftir 10 ár verður ekki spurt að aðferðunum sem var beitt heldur því að Frjálslyndi flokkurinn jók fylgi sitt um 3,2 % og tvöfaldaði þingmannafjölda flokksins, úr tveimur í fjóra. Að því leyti er hægt að taka undir það að Frjálslyndir voru að vissu leyti sigurvegarar þessara kosninga.

Framsókn segjast einnig vera sigurvegarar kosninganna. Þeir vilja m.a. meina það að á þeirra herðum hafi hvílt erfiðustu málaflokkarnir. Þeir voru með félagsmálin, heilbrigðismálin, umhverfismálin og síðast en ekki síst iðnaðarmálin, þar sem allt fór jú í bál og brand yfir útaf fyrirhugaðri Kárahnjúkavirkjun. Einnig var flokknum spáð algeru afhroði fyrir kosningarnar því allar kannanir langt aftur í tímann bentu eindregið til þess. En þessi rótgróni landbúnaðarflokkur kom sterkur inn á lokakaflanum og háði ótrúlegan endasprett. Þeirra fylgi stóð þó nokkurn veginn í stað frá síðustu kosningum, töpuðu 0,7 % af því fylgi og þingmannatalan hélst sú sama, eða ellefu menn. Því er ekki hægt að segja að Framsókn séu einhverjir sigurvegarar, frekar væri að segja að þeir hefðu átt besta endasprettinn.

En Samfylkingin vill eigna sér allan heiðurinn af þessum kosningum og segist að sjálfsögðu vera sigurvegari, eins og þeirra er von og vísa. Eitt er mjög einkennandi fyrir vinstri menn, þeir segjast alltaf vera sigurvegarar allra kosninga og virðast þeir þá engu skeyta um úrslitin sjálf eða tölurnar. Nægir að nefna bæjarstjórnarkosningarnar í fyrra þar sem Sjálfstæðisflokkurinn fékk 47 % allra greiddra atkvæða í Vestmannaeyjum, 8 % meira en V-listinn sem að auki tapaði þónokkru fylgi frá bæjarstjórnarkosningunum þar á undan. Meirihlutinn féll að vísu vegna framboðs Framsóknar og vinstri menn fögnuðu eins og óðir væru og lýstu því yfir statt og stöðugt að þeir væru sigurvegarar kosninganna! Hvernig er hægt að vera sigurvegari kosninga með minna fylgi en fjórum árum áður og þar að auki með 8 % færri atkvæði en aðalkeppinauturinn og ná því ekki aðalmarkmiðinu, að komast yfir Sjálfstæðisflokkinn? Allavega er það ofar mínum skilningi.

En sem sagt Samfylkingin er að þeirra mati, sigurvegarar þessarar kosninga. Það er jú alveg rétt að flokkurinn bætti við sig 4,2 % frá síðustu kosningum og þremur þingsætum á meðan Sjálfstæðisflokkurinn tapaði 7 % frá því síðast og fjórum þingsætum. Það er að mínu mati alltof mikið en ef mið er tekið af því að í kosningunum ´99 setti Sjálfstæðisflokkurinn met í fylgi, voru með yfir 40 % fylgi á landsvísu sem er auðvitað með ólíkindum gott, voru allar líkur á því að flokkurinn myndi tapa fylgi næst. Miklu nær er að horfa á meðalfylgi flokksins sem er tæplega 37 % og þá sést að tapið er ekki eins mikið eða rétt um 3 %.

En hver voru markmið Samfylkingarinnar í þessum kosningum? Jú, það voru þrjú helstu markmið. Númer eitt var að steypa Sjálfstæðisflokknum og Davíð Oddssyni af stóli og fella ríkisstjórnina. Það tókst ekki. Númer tvö var að verða stærri en Sjálfstæðisflokkurinn. Það tókst ekki. Númer þrjú var að koma Ingibjörgu Sólrúnu inn á þing. Það tókst ekki. Hvernig getur flokkur sem setur sér þrjú markmið fyrir kosningarnar og tekst ekki að ná neinum af þeim, sagst vera sigurvegari? Enn og aftur er það ofar mínum skilningi.

Sjálfstæðisflokkurinn hafði verið í ríkisstjórn í 12 ár og sótt var að honum sem aldrei fyrr. Markmið Sjálfstæðisflokksins var allan tímann mjög skýrt. Að ríkisstjórnin héldi velli. Og viti menn! Það tókst!

Svartur dagur í sögu Vestmannaeyja
Grein sem birtist í Fréttum 2. apríl 2003. Byggt að litlu leyti á greininni "Meirihlutinn að springa" sem finna má hér neðar.

Eins og bæjarbúar hafa væntanlega heyrt þá er meirihlutasamstarf Sjálfstæðisflokks og Framsóknarflokks í bæjarstjórn Vestmannaeyja sprungið og nýr meirihluti V-listans og Andrésar Sigmundssonar var myndaður í síðustu viku. Óhætt er að segja að sá dagur, mánudagurinn 25. mars 2003, sé svartur dagur í sögu Vestmannaeyja. Mig hryllir við þeirri tilhugsun að bæjarfélagið sé nú undir stjórn V-listans, sem ekki einu sinni getur undirbúið sig almennilega fyrir bæjarstjórnarfundi, hvað þá stjórnað heilu bæjarfélagi ásamt svo Andrési, sem á innan við einu ári hefur yfirgefið tvö stjórnmálasamtök með látum, geri aðrir betur. Og nú í síðara skiptið, sem var öllu verra en það fyrra, skilur hann allt eftir í rúst með því að ganga einn til samstarfs við Lúðvík því hann skilur við allt sitt samstarfsfólk sem er nú án bæjarfulltrúa. Það þýddi það að allt hans fyrrverandi samstarfsfólk hefði staðið eftir algerlega án nokkurra áhrifa, ekki með eina einustu nefndarstöðu í bænum ef ekki hefði verið vegna samstarfs við Sjálfstæðisflokkinn í minnihluta.

Andrés óánægður með samgöngunefnd
Samkvæmt yfirlýsingum Andrésar síðustu daga, þá er hann gríðarlega óánægður með framgöngu nefndar þeirrar sem skilaði af sér skýrslu fyrir stuttu síðan um samgönguúrbætur við Vestmannaeyjar og í eiga sæti þeir Guðjón Hjörleifsson og Arnar Sigurmundsson bæjarfulltrúar Sjálfstæðisflokksins.
Eins og flestir vita þá er Andrés ósáttur við það að nefndin skyldi hafa útilokað háhraðaferju sem einn valkost í stöðunni. Einnig er hann ósáttur við það, að ekki verði tekin ákvörðun um framtíðarlausn í samgöngumálum fyrr en í lok ársins 2005, og að ekki færi neitt að gerast í samgöngumálum Eyjamanna fyrr en í fyrsta lagi 2008-9.
Hérna komum við að mjög mikilvægum punkti og skulum við því staldra aðeins við. Í fyrsta lagi eru jarðgöng og höfn í Bakkafjöru klárlega framtíðarlausnir á samgöngum milli lands og Eyja, þ.e.a.s. ef þær eru mögulegar Báðir þessir kostir eru gríðarlega spennandi, sér í lagi jarðgöngin. Eina sem þarf að fá botn í, er hvort þessar leiðir séu mögulegar og þá hvað þær munu kosta, og munu niðurstöðurnar í þeim málum fást í lok ársins 2005, jafnvel mun fyrr. Skynsemin hlýtur að segja að miklu mun betra sé að rannsaka bæði jarðgöng og Bakkafjöru og klára þau mál áður en farið verður útí mjög svo kostnaðarsamar aðgerðir, eins og nýjan Herjólf eða annað, því þá getum við gleymt þessum tveimur aðalkostum næstu 20-25 árin. Því það er alveg klárt að ef kemur upp sú staða að þessir tveir meginkostir verða ekki framkvæmanlegir þá munu Vestmannaeyjar aldrei getað staðið á jafnréttisgrundvelli gagnvart öðrum sveitarfélögum, eins og raunin er nú. Við vitum það einnig frá reynslu okkar hin síðari ár, að það er ekki beint verið að dæla peningum í samgöngur hér á milli, það er barist um hverja einustu krónu. Því verðum við að nýta hverja krónu sem við fáum og fara rétt að þessu, athuga fyrst dýrustu en jafnframt bestu leiðirnar og vinna út frá því.

Háhraðaferja er slæmur kostur
Varðandi háhraðaferjuna þá hefur það komið í ljós að þessi ferja er ekki haffær ef ölduhæð er fimm metrar eða meira og væri þá einungis verið að miða við þol skipsins sjálfs. En miðað við þol farþega þá myndi skipið ekki vera haffært í ölduhæð sem næmi fjórum metrum eða meira. Ástæðan eru mikil högg og veltingur, jafnvel þótt slegið yrði af hraðanum. Einnig eru þessi skip mjög létt og því væri beinlínis hættulegt að fara á þessum skipum í vondum veðrum. En Andrés telur þetta ekki rétt og sagði á samgöngufundinum 6. mars s.l. að það væri sorglegt að ekki væri aflað upplýsinga á réttum stöðum. Upplýsti þá nefndin Andrés, að allar upplýsingar um skipið væru fengnar frá hönnuðum skipsins og skipasmíðastöð þess auk þess sem upplýsingar um sjófærni þessara skipa voru fengnar frá svokölluðum flokkunarfélögum sem hafa mótað sérstakar reglur fyrir háhraðaferjur. Sem sagt: ekki hægt að fá betri upplýsingar! En til að meta sjófærni þessara skipa nota þessi flokkunarfélög svokallaðan Beufortkvarða. Skv. honum eru háhraðaferjur ekki sjófærar við Beufort 6 eða meira. Í Beufort 6 er vindhraði 13,8 m. á sek og ölduhæð 4 metrar. Hæð öldu á siglingaleiðinni milli Vestmannaeyja og Þorlákshafnar er 4 metrar eða meira 10,4 % á ársgrundvelli. Þetta myndi því þýða það að 10,4 % af öllum ferðum skipsins myndu falla niður á ársgrundvelli og það sér það hver heilvita maður að það er ekki boðlegt fyrir skip í áætlunarsiglingum. Fyrir utan það eru þessi skip ekki einu sinni gerð til að flytja flutningabíla, og aftur sér það hver heilvita maður að það þarf Vestmannaeyjaferja nauðsynlega að geta. Einnig er rekstrarkostnaður svona skipa miklu mun meiri en hjá hefðbundnum skipum. Þess ber einnig að geta að nefndin leitaði álits margra skipaverkfræðinga og mælti enginn með slíku skipi til reglubundinna heilsárssiglinga á þessari leið. Einnig bentu skipaverkfræðingarnir á það að skip sem hefðu ganghraða meira en 20-22 sjómílur henti engan veginn á svo erfiðri siglingaleið.

Andrés og V-listinn hafa greinilega lítið sem ekkert kynnt sér skýrslu samgöngunefndar
En það var fleira sem Andrés var ekki sáttur við. Hann var mjög óánægður með að nefndin hefði ekki komið með neinar tillögur varðandi úrbætur strax í samgöngum milli lands og Eyja, bæði hvað varðaði flugið og fjölgun ferða Herjólfs. Þessi málflutningur er með ólíkindum því í skýrslu nefndarinnar er lagt til að um næstu áramót þegar núverandi samingar um sjúkra- og áætlunarflug á landinu renna út verði athugað hvort ekki sé unnt að styðja við flug til Eyja. Og fyrir þá sem ekki skilja það að samgönguyfirvöld hafi ekki fyrir löngu boðið þessa flugleið út, líkt og gert var á Höfn í Hornafirði er ástæðan sú að í samkeppnisreglum EES segir að ef að flugfélag flýgur viljugt á einhverri flugleið þá megi ekki bjóða þá flugleið út. Á Höfn var staðan sú að ekki var neitt flugfélag sem hafði áhuga á að fljúga og því var hægt að bjóða flugið út. Hér hefur alltaf verið til staðar flugfélag sem hefur verið viljugt að fljúga hingað. Einnig leggur nefndin til að ferðum Herjólfs verði fjölgað um 22 á ári í viðbót við þá 30 % aukningu sem orðið hefur á ferðum Herjólfs s.l. sex mánuði. Er staðan þannig að það er nánast ekki hægt að bæta við fleiri ferðum en þetta, hreinlega vegna veðurs yfir verstu vetrarmánuðina.

Andrés með engan stuðning að baki sér
En nú hefur Andrés sem sagt slitið meirihlutasamstarfinu og myndað meirihluta með Lúðvíki Bergvinssyni og V-listanum algjörlega einn og óstuddur. Fyndnast við þetta er þó það að það er ekki liðið ár frá því að Andrés sagði sig úr V-listanum vegna mikils ágreinings og vegna þess að ekki var pláss fyrir hann á lista þeirra fyrir síðustu kosningar! Sem dæmi um það hvað þetta er allt saman fáránlegt þá er Andrés ekki með neinn varabæjarfulltrúa að baki sér því hann hafði jú engan stuðning úr Framsóknarflokknum með þessari ákvörðun sinni, en ætlar að reyna að redda málum með því að fá mann í tólfta sæti lista Framsóknar og óháðra til að vera varabæjarfulltrúi sinn! Og þar sem Framsóknarfólk ætlar sér frekar að vinna í minnihluta með Sjálfstæðisflokknum heldur en í meirihluta með Lúðvík og félögum í V-listanum, og er ekki að undra, þýðir það að á hverjum einasta bæjarstjórnarfundi sem Andrés mætir ekki á, er meirihlutinn fallinn! Nema að sjálfsögðu að þessi tólfti maður fái leyfi til að sitja bæjarstjórnarfundi, sem yrði auðvitað ekkert annað en hrein móðgun við kjósendur. Hljóta því kjósendur sem kusu hann í bæjarstjórnarkosningunum að naga sig heldur betur í handarbökin.

Tillögur nefndarinnar miða að hagsmunum Eyjamanna – eiginhagsmunir stjórna Lúðvík og Andrési
En Andrés og Lúðvík vilja breytingar í samgöngumálum og vilja þær núna. En hvað ætla þeir að gera? Galdra fram nýjan Herjólf á einum degi í stað 5-6 ára? Auðvitað er enginn sáttur við stöðu samgöngumála í Eyjum í dag og ég er alveg á því að fyrir löngu hefðu Sturla og fyrirrennarar hans átt að bæta samgöngur á milli lands og Eyja. En eins og málin standa í dag er staðreyndin einfaldlega sú að það er ekkert hægt að gera annað en það sem tillögur samgöngunefndarinnar miða að og miða þær svo sannarlega að hagsmunum Eyjamanna. Þrátt fyrir það höfnuðu Andrés og V-listinn tillögum nefndarinnar á síðasta bæjarstjórnarfundi.

Það sem svo eftir stendur er því þetta:
• Lagt er til í skýrslunni að ferðum Herjólfs verði enn fjölgað.
• Lagt er til í skýrslu samgöngunefndarinnar að kannað verði möguleiki á útboði á flugleiðinni milli lands og Eyja um næstu áramót
• Draumur Andrésar um háhraðaferja er einfaldlega mjö slæmur kostur eins og komið hefur fram hér að framan
• Rannsóknum verði haldið áfram í Bakkafjöru
• Rannsakaðir verði möguleikar á vegtengingu milli lands og Eyja – rannsóknir hefjist í sumar

Þá er aðeins eitt sem stendur eftir og það er nýr Herjólfur. Og þá komum við aftur að mjög mikilvægum punkti sem við skulum staldra aðeins við og fólk verður hreinlega að gera sér grein fyrir. Ferlið sem það tekur að fá hingað nýjan Herjólf er 5-6 ár. Ef farið yrði í undirbúning á nýjum Herjólfi á morgun þá fengjum við hann afhentan 2008-9. Það er nákvæmlega sama ártal og Andrés og V-listinn segja að sé alltof langt í að lausn fáist! Fyrir svo utan það, að ef farið yrði í smíði nýs Herjólfs nú, eins og ég óttast meira en líf mitt að verði niðurstaða Lúlla og Andrésar, þá fáum við hvorki göng né höfn í Bakkafjöru næstu 20-25 árin, 5-6 ár í aðdraganda nýs Herjólfs og svo líftími skipsins þ.e. 15-17 ár. Fólk hlýtur því að sjá það að megintillögur nefndarinnar sem miða að því að í lok ársins 2005 verði tekin lokaákvörðun, þegar komið er í ljós hvort höfn í Bakkafjöru eða jarðgöng eru möguleg, sé langbesta og skynsamlegasta lausnin. Ef svo kemur í ljós að hvorki göng né höfn í Bakkafjöru séu raunhæfir kostir þá verður að sjálfsögðu ráðist í nýjan Herjólf sem þá yrði afhentur 2008-9 því áætlað er að vinna ýmsa vinnu varðandi nýjan Herjólf næstu tvö árin til að spara tíma þegar á svo að taka lokaákvörðun. En því miður virðist annað vera uppá borðinu hjá Andrési og V-listanum sem ætla sér að fórna hagsmunum bæjarins fyrir sína eigin. En ég neita hreinlega að trúa því að þetta sé vilji fólksins þarna úti og hreinlega neita að trúa því að það glapræði verði unnið, þ.e. að fara útí einhverjar aðgerðir áður en niðurstaðan í jarðgöngum og Bakkafjöru liggja fyrir. Sú niðurstaða yrði svo sannarlega ekki miðuð að hagsmunum Eyjamanna. Og það að nýji meirihlutinn hafi hafnað tillögum nefndarinnar á síðasta bæjarstjórnarfundi, hægir á öllu ferlinu og verður jafnvel til þess að seinka þessu öllu saman um einhver ár. Hvet ég því nýjan meirihluta til að draga til baka þá ákvörðun að hafna tillögum nefndarinnar og samþykkja þær, í guðanna bænum hættiði að láta eins og þetta sé pólitískt mál, það er það ekki.
Að lokum langar mig að benda öllum þeim sem vilja veg Vestmannaeyja sem mestan að skoða skýrslu samgöngunefndarinnar sem má sækja í heild sinni á vefslóðinni http://samgonguraduneyti.is/interpro/samgongur/samgongur.nsf/pages/frett030023. Nóg er að skoða tvær öftustu síðurnar en þar eru tillögur nefndarinnar. Þá fáiði séð hvurslags fíflagangur þessi ákvörðun Andrésar og V-listans að hafna tillögum hópsins er og þá sjáiði einnig að málflutningur þeirra snýst meira um skammsýni og blekkingar heldur en hagsmuni bæjarfélagsins.

Undirritaður situr í stjórn Eyverja og er annt um framtíð Vestmannaeyja.

Meirihlutinn að springa?
Eins og bæjarbúar hafa væntanlega heyrt þá er meirihlutasamstarf Sjálfstæðisflokks og Framsóknarflokks í bæjarstjórn Vestmannaeyja í hættu. Skv. Andrési Sigmundssyni oddvita Framsóknar í bæjarstjórn þá er hann gríðarlega óánægður með framgöngu nefndar þeirrar sem skilaði af sér skýrslu fyrir stuttu síðan um samgönguúrbætur við Vestmannaeyjar og í eiga sæti þeir Guðjón Hjörleifsson og Arnar Sigurmundsson bæjarfulltrúar Sjálfstæðisflokksins. Hótar Andrés að ef samgönguráðherra gangi að þessum tillögum þá sé meirihlutinn fallinn. Er Andrés fyrst og fremst mjög ósáttur við það að nefndin skyldi hafa útilokað háhraðaferju sem einn valkost í stöðunni. Andrés var í viðtali á þriðjudag á RÚV og sagði hann þar að hann væri einnig ósáttur við það, að ekki verði tekin ákvörðun um framtíðarlausn í samgöngumálum fyrr en árið 2006, og að ekki færi neitt að gerast fyrr en í fyrsta lagi 2009-10 í samgöngumálum Eyjamanna. Í fyrsta lagi er miklu mun skynsamlegra að rannsaka bæði jarðgöng og bakkafjöru og klára þau mál áður en farið verður útí einhverjar kostnaðarsamar aðgerðir, eins og nýjan Herjólf eða annað, því jarðgöng og höfn í Bakkafjöru eru langskynsamlegasti kosturinn. Við vitum það frá reynslu okkar hin síðari ár, að það er ekki beint verið að dæla peningum í samgöngur hér á milli. Því verðum við að nýta hverja krónu sem við fáum og fara rétt að þessu, athuga fyrst dýrustu en jafnframt bestu leiðirnar og vinna út frá því..

En reiði Andrésar vegna þessa máls kom fyrst berlega í ljós á samgöngufundi sem haldinn var þann 6. mars s.l. þar sem samgöngunefnd þessi skilaði af sér tillögum sínum. Var undirritaður á fundinum og varð vitni að ótrúlegum ræðuhöldum oddvitans og varð hann sjálfum sér og flokknum hreinlega til skammar. Varðandi þessa háhraðaferju þá kom það í ljós á þessum fundi að þessi ferja er ekki haffær ef ölduhæð er fimm metrar eða meira og væri þá einungis verið að miða við þol skipsins sjálfs. En miðað við þol farþega þá myndi skipið ekki vera haffært í ölduhæð sem næmi fjórum metrum eða meira. Ástæðan eru mikil högg og veltingur, jafnvel þótt slegið yrði af hraðanum. Einnig eru þessi skip mjög létt og því væri beinlínis hættulegt að fara á þessum skipum í vondum veðrum. Einnig er engin aðstaða fyrir farþegar um borð önnur en sæti.
En Andrés var ekki sáttur með þetta. Hann sté í pontu og sagði þessar upplýsingar rangar og sagði sorglegt að horfa uppá það að ekki hefðu allir möguleikar verið kannaðir og lélegt að ekki væri aflað upplýsinga á réttum stöðum o.s.frv. Vildi Andrés einnig meina að skipið væri alveg fyllilega haffært í fimm metra ölduhæð, einungis þyrfti að slá af hraðanum. Upplýsti þá nefndin fundinn, og um leið Andrés, um það að allar upplýsingar um skipið væru fengnar frá hönnuðum skipsins og skipasmíðastöð þess auk þess sem upplýsingar um sjófærni þessara skipa voru fengnar frá svokölluðum flokkunarfélögum sem hafa mótað sérstakar reglur fyrir háhraðaferjur. Til að meta sjófærni þessara skipa nota þessi flokkunarfélög svokallaðan Beufortkvarða. Skv. Beufortkvarðanum eru háhraðaferjur með siglingatakmarkanir við Beufort 6 eða meira. Í Beufort 6 er vindhraði í 13,8 m. á sek og ölduhæð 4 metrar.

Beufort-kvarðinn
SJÓLAG VINDHRAÐI MESTA ÖLDUHÆÐ HEITI
Beaufort 0 0,2 m/sek 0,0 m Logn
Beaufort 1 1,5 m/sek 0,1 m Andvari
Beaufort 2 3,3 m/sek 0,3 m Kul
Beaufort 3 5,4 m/sek 1,0 m Gola
Beaufort 4 8,0 m/sek 1,5 m Stinningsgola
Beaufort 5 10,7 m/sek 2,5 m Kaldi
Beaufort 6 13,8 m/sek 4,0 m Stinningskaldi
Beaufort 7 17,1 m/sek 5,5 m Allhvasst
Beaufort 8 20,7 m/sek 7,5 m Hvassviðri
Beaufort 9 24,4 m/sek 10,0 m Stormur
Beaufort 10 28,4 m/sek 12,5 m Rok
Beaufort 11 32,6 m/sek 16,0 m Ofsaveður
Beaufort 12 32,6 m/sek Fárviðri

Hæð öldu á siglingaleiðinni milli Vestmannaeyja og Þorlákshafnar er 4 metrar eða meira 10,4 % á ársgrundvelli. Þetta myndi því þýða það að 10,4 % af öllum ferðum skipsins myndu falla niður á ársgrundvelli og það sér það hver heilvita maður að það er ekki boðlegt fyrir skip í áætlunarsiglingum. Fyrir utan það eru þessi skip ekki einu sinni gerð til að flytja flutningabíla, og aftur sér það hver heilvita maður að það þarf Vestmannaeyjaferja nauðsynlega að geta. Einnig er rekstrarkostnaður svona skipa miklu mun meiri en hjá hefðbundnum skipum. Þess ber einnig að geta að nefnd þessi leitaði álits margra skipaverkfræðinga og mælti enginn með slíku skipi til reglubundinna heilsárssiglinga á þessari leið. Einnig bentu skipaverkfræðingarnir á það að skip sem hefðu ganghraða meira en 20-22 sjómílur henti engan veginn á svo erfiðri siglingaleið. Þessu öllu til staðfestingar ætla ég að taka lítið dæmi sem birtist í skýrslunni sem samgöngunefndin skilaði af sér. “Árið 2000 stóð fyrir dyrum endurnýjun skipakostsins á ferjuleiðinni milli Tasmaníu og meginlands Ástralíu yfir svonefnt Bass-sund og fengu þá stjórnvöld háskólann í Nýja Suður-Wales til að gera úttekt á því hvort háhraðaferjur gætu hentað þar. Hæð öldu á siglingaleiðinni í Bass-sundi er yfir 4 metrar meira en 7% tímans á ársgrundvelli enda er sundið álitið veðrarass af heimamönnum. Þrátt fyrir augljósa hagsmuni stjórnvalda í því að endurnýja skipakostinn á ferjuleiðinni með heimabyggðum háhraðaferjum varð niðurstaðan sú að endurnýja umræddan ferjuflota með nýlega byggðum (1998) en notuðum, hefðbundnum en gangmiklum ferjum frá Finnlandi.”

Eins og kom fram hér að framan þá er ölduhæð á milli Eyja og Þorlákshafnar 4 metrar eða meiri, 10,4 % á ársgrundvelli. Það þýðir 50 % hærri tíðni en á Bass-sundi þar sem hætt var við að nota háhraðaferjur!

En þrátt fyrir þetta lét Andrés sér ekki segjast á þessum títtnefnda samgöngufundi. Hann hélt því statt og stöðugt fram að þetta væru ekki réttar tölur og að skipið væri fyllilega haffært í fimm metra ölduhæð, einungis þyrfti að slá af o.s.frv. o.s.frv. Var andrúmsloftið á fundinum orðið þannig að maður hálf skammaðist sín fyrir hönd Andrésar og sá ég suma Framsóknarmenn halda höndum fyrir andlitum sínum en hvort það átti að tákna þreytu eða eitthvað annað hjá viðkomandi einstaklingum, skal ekki fullyrt hér.

En nú hefur Andrés sem sagt lýst því yfir að meirihlutasamstarfið hangi á bláþræði vegna þessa máls og nokkurra annarra mála reyndar. “Þetta er kornið sem fyllti mælinn”, eins og Andrés sjálfur orðaði það. Ætlar Andrés virkilega að verða sér til skammar? Vandamálið er einfaldlega það að hann skilur ekki þessar tölur og upplýsingar sem fengnar voru frá hönnuðum og skipasmiðum skipsins og fleiri aðilum. Ætlar Andrés virkilega að sprengja meirihlutann vegna þessa? Ég hreinlega neita að trúa því að maðurinn ætli sér að enda þetta meirihlutasamstarf og taka til við þau óhæfu samtök sem V-listinn svo sannarlega er, bæjarfélagið má ekki við því.

Andrés fullyrti á samgöngufundinum að hann og Framsókn ættu engra hagsmuna að gæta varðandi þessa háhraðaferju. Það getur svo sem vel verið að það sé rétt, þótt einhvern veginn efist maður um það eftir alla þessa atburðarás, en þótt Andrés og hans menn eigi engra hagsmuna að gæta varðandi þessa ferju þá eigum við Vestmannaeyingar mikilla hagsmuna að gæta í þessu meirihlutasamstarfi Sjálfstæðisflokks og Framsóknar og því verður Andrés að átta sig á.

Eftir stendur þetta: betri upplýsingar var ekki hægt að fá um skipið og sjófærni þess. Þetta er alveg borðleggjandi og ég furða mig hreinlega á því hvað af þessu Andrés skilur ekki, því ég tel þetta ekki mjög svo flókið mál. Þessi háhraðaferja er einfaldlega ekki boðleg á þessari siglingaleið.

Því segi ég við þig Andrés: opnaðu augun og sættu þig við að þetta er einfaldlega ekki góður kostur. Hættu þessum barnaskap, gleymdu þessari ferju og reyndu heldur að beita kröftum þínum í að efla bæjarfélagið og einbeita þér að þeim samgönguúrbótum sem eru mögulegar og eru margar hverjar virkilega spennandi.

P.S. Skýrslu nefndarinnar má sækja í heild sinni á vefslóðinni http://samgonguraduneyti.is/interpro/samgongur/samgongur.nsf/pages/frett030023

Eru vinstri menn ekkert nema málefnalaus froða?
Þetta er spurning sem brennur á vörum margra þessa dagana og er ekki að undra. Ingibjörg "Gróa á leiti" Sólrún hefur undanfarnar vikur talað opinskátt um hin og þessi mál og farið mikinn. Hefur hún minnst á óeðlileg ríkisafskipti af fyrirtækjum þegar staðreyndirnar sýna að ríkisafskipti hafi aldrei verið eins lítil og nú. Gott dæmi um hve asnalegur þessi málflutningur Ingibjargar er að t.d. börðust Alþýðuflokkurinn og Alþýðubandalagið hér í den með kjafti og klóm gegn sölu eignarhluts ríkisins í viðskiptabönkunum á meðan Sjálfstæðisflokkurinn lagði mikið kapp, árum saman, á að selja. Svo núna talar Samfylkingin um að Sjálfstæðisflokkurinn sé að hafa óeðlileg afskipti af atvinnulífinu! Þetta er auðvitað bara hrein og klár móðgun við kjósendur og sýnir kannski best málefnafátækt Samfylkingarinnar.

Hefur einhver orðið var við stefnu Samfylkingarinnar í komandi kosningum? Hefur einhver orðið var við þá stefnu sem Ingibjörg Gróa ætlar að beita og fara eftir? Hefur einhver séð þær lausnir og úrbætur sem Ingibjörg hyggst beita ef hún kemst til valda? Nei, ég hef ekki orðið var við það sem og enginn í þessu ágæta landi okkar. Því staðreyndin er sú að málefnafátæktin er svo mikil að ekkert annað er að gera fyrir Rauðstakkana en að níðast á andstæðingunum með kjafti og klóm.

Þetta er ekki ósvipað og hefur verið að gerast á okkar undurfagra eyjaklasa, Vestmannaeyjum. Hér hefur V-listinn með Lúðvík Bergvinsson í broddi fylkingar skipulagt beitt sér gegn Sjálfstæðisflokknum og þá aðallega Guðjóni Hjörleifssyni til að reyna að gera störf hans tortryggileg. Hefur umfjöllun minnihlutans um Þróunarfélag Vestmannaeyja verið hreint með ólíkindum og öllum brögðum beitt. Hafa menn ekki hikað að beita fyrir sig lygum og rógburði. En til hvers? Jú, til þess að fá þig, kjósandi góður, til að kjósa Lúðvík í stað Guðjóns í Alþingiskosningunum í vor. Nákvæmlega það sama og Samfylkingarforustan er að reyna að gera í landsmálunum, fá kjósendur til að kjósa Ingibjörgu (Samfylkinguna) í stað Sjálfstæðisflokksins (Davíðs). Menn segja að svona sé pólitíkin og s.frv. En mér finnst þetta ekki pólitík. Ég er enginn stjórnmálafræðingur en mér finnst pólitík ekki vera það að beita rangfærslum og oft á tíðum hreinum lygum til að koma höggi á andstæðinginn þar sem málefnalegar umræður fá að fjúka út í veður og vind. Er von að menn velti fyrir sér hvort þetta sé hreinlega ekki heilaþvottur?

Ef Lúðvík Bergvinsson oddviti V-listans á einhvern tímann eftir að sjá þessi orð þá hugsar hann eflaust: "Hvað er þessi strákasni að skipta sér af þessum málum? Hann hefur ekki hundsvit á pólitík". Og ef einhver sem hefur lítið vit á stjórnmálum sér þetta hugsar sá eflaust: "Auðvitað segir hann þetta af því hann er blár". En staðreynd málsins er sú, að burtséð frá því hvort þú ert strákasni, Sjálfstæðismaður eða hreinlega vinstri maður, þá hefur öllum þeim sem hafa kynnt sér málefni Þróunarfélagsins og vinnubrögð V-listans í því máli (og vilja viðurkenna þau), hreinlega blöskrað, sem og yfir vinnubrögðum Ingibjargar Sólrúnar síðustu vikur þar sem hún hefur látið stjórnast af sögusögnum sem hafa sprottið upp í hennar eigin flokki.

Og eitt er víst, ef Sjálfstæðisflokkurinn mun einhvern tímann taka upp þvílík vinnubrögð sem V-listinn og Samfylkingin hafa viðhaft síðustu vikur og mánuði þá farvel frilla mín og bone apetit!!

Grein skrifuð 24. feb 2003 og birtist í Fréttum
Háðung Vestmannaeyjalistans
V-listinn hefur oftar en einu sinni vakið furðu mína fyrir slælega frammistöðu í mörgum málum. Hingað til hef ég látið mér nægja að hrista hausinn og ræða það við vini og kunningja. Ég hef til að mynda verið mjög hissa á ósjálfstæði Guðrúnar Erlingsdóttur, sem hefur það fyrir vinnureglu að taka afstöðu til mála eftir að hafa rætt við Lúðvík í stað þess að taka sjálfstæðar ákvarðanir á Bæjarráðsfundum. Einnig finnst mér umræða V-listafólks um Þróunarfélagið verið mjög rætin og margt fleira í sambandi við þeirra vinnubrögð hefur vakið furðu mína. En nú hefur steininn tekið úr og ég því ákveðið að setja þessar línur á blað.

Þannig er að á síðasta bæjarstjórnarfundi, þann 30. janúar varð V- listinn sér til algerar háðungar (og ekki í fyrsta skipti). Skrif mín snúast þó einungis um þann fund. Rétt er að taka það fram að undirritaður sat ekki þennan fund en hefur kynnt sér málin vandlega með viðræðum við bæjarfulltrúa, gesti í sal og lestur fundargerða.

Nefnd ungs fólks
Þannig er mál með vexti að ég sit í nefnd sem skipuð var síðasta haust um málefni ungs fólks. Í þessari nefnd sitja með mér tveir V-lista menn, þeir Smári Jökull Jónsson og Hjalti Einarsson (þótt Hjalti sé tæknilega séð fulltrúi Framsóknarflokksins). Báðir þessir menn sitja einnig í stjórn ungliðahreyfingar V-listans, en sá hópur hefur haft þann leiða sið að vakna úr dvala rétt fyrir bæjarstjórnarkosningar, þ.e. á fjögurra ára fresti. Höfum við í Nefnd ungs fólks fundað einu sinni, þann 25. október s.l.. Fundargerð var rituð eins og siður er og var henni skilað til íþrótta- og tómstundaráðs daginn eftir.
Á fyrrnefndum Bæjarstjórnarfundi síðasta fimmtudag var mikið rætt um málefni þessarar nefndar og kom fyrirspurn frá fulltrúum V-listans hvort að haldnir hefðu verið einhverjir fundir hjá nefndinni, og ef svo væri þá hefði ekki verið skilað inn fundargerðum. Það er því alveg greinilegt að V-listinn virðist ekki einu sinni hafa samband við sitt eigið nefndarfólk! Því ef þau hefðu haft fyrir því t.d. að tala við Smára eða Hjalta þá hefðu þau komist að því að einn fundur hefði verið haldinn, fundargerð rituð og henni skilað inn. Einnig hægt að skoða fundargerðir Íþróttaráðs frá 5.desember s.l. (10.mál). Þetta er hreinlega hlægilegt hjá V-listanum, sérstaklega í ljósi þess að maðurinn sem bar þetta upp á fundinum, Jóhann Ólafur Guðmundsson er formaður stjórnar ungliðahreyfingar V-listans sem er auk hans skipuð fjórum einstaklingum. Af þessum fjórum eru einmitt Smári og Hjalti! Þannig að greinilegt er að samskipti innan V-listans eru engin og ekki virðist fyrir því að fara að fulltrúar V-listans undirbúi sig fyrir bæjarstjórnafundi, því þá þyrftu svona mál ekki að koma upp.

Um málefni Lucina
Þetta mál um nefnd ungs fólk var ekki það eina sem sprakk í andlitið á V-listamönnum á þessum fundi. Einn af áheyrendum í sal orðaði við mig, eftir fundinn, að engu líkara væri en að V-listinn lægi í dvala á milli funda, eða allavega virtust þeir ekki nota tímann til að kynna sér málin. Jóhann Guðmundsson bar upp fyrirspurn á þessum fundi er snerti mál fyrirtækisins Lucina og furðaði sig mjög á að fyrirtækið skyldi ekki hafa hlotið neina fyrirgreiðslu hjá Þróunarfélaginu. Fulltrúar meirihlutans upplýstu Jóhann og hans fólk hinsvegar um að ekkert erindi þess efnis hefði borist frá þessu fyrirtæki á borð stjórnar Þróunarfélagsins. Nú kemur tvennt til greina. Annað hvort hefur V-listinn ekki undirbúið sig fyrir þennan fund eða þá að þeir ætlast til að Vestmannaeyjabær dreifi peningum til fyrirtækja án þess að þau hafi sótt um þá!

V-listinn leitar í smiðju Eyverja eftir hugmyndum
Nú fyrir skemmstu skrifaði Lúðvík Bergvinsson oddviti V listans grein þar sem hann lýsti þeirri skoðun sinni að ráðast ætti sem fyrst í smíði nýs Herjólfs enda væri það hans framtíðarsýn hvað varðar samgöngur við Vestmannaeyjar. Sjálfur er ég þeirrar skoðunar að Lúðvík sé þarna mjög skammsýnn og geri minni kröfur fyrir hönd heimabyggðar sinnar en íbúar almennt, að minnsta kosti þeir sem eru af yngri kynslóðinni. Ég virði þó þessa skoðun hans. Það vakti því undrun mína þegar í ljós kom að fulltrúar V-listans lögðu fram eftirfarandi tillögu: "Bæjarstjórn Vestmannaeyja hefji nú þegar undirbúning að stofnun félags sem hafi það að markmiði að byggð verði jarðgöng milli lands og Eyja". Um leið og það vakti furðu mína að V-listinn gengi þarna í berhögg við skoðanir oddvita síns og þingmanns þá vakti þetta líka hlátur hjá mér og mörgum öðrum. Ástæða hlátraskalla var að þennan sama dag kom úr prentsmiðjunni blaðið Stofnar sem Eyverjar gefa út, þar sem Eyverjar lýsa þeirri skoðun sinni að jarðgöng séu vænlegasti kosturinn í samgöngum milli lands og Eyja og auglýsa á forsíðunni að þeir munu beita sér fyrir stofnun áhugahóps um þetta mál. Enn fremur er þessi tillaga minnihlutans næstum orðrétt upp úr stjórnmálaályktun Eyverja.

Sem Eyverji segi ég því við bæjarfulltrúa V listans: Ef ykkur vantar frekari hugmyndir að tillögum og ályktunum, verið þá óhrædd að leita til okkar.

Grein skrifuð 1.feb 2003 og birtist á eyverjar.is
V-listinn uppfærir heimasíðuna!
Já! Þau undur og stórmerki hafa gerst að V-listinn hefur uppfært heimasíðu sína sem var sett á laggirnar fyrir bæjarstjórnarkosningarnar síðasta vor eða í maí 2002.

Fyrsta uppfærslan átti sér stað 9. desember sem þýðir sjö mánuðum eftir að síðan var sett á laggirnar! En á síðunni stendur einmitt að hún hafi verið sett á laggirnar til að koma á betra sambandi við kjósendur! Þetta er dæmi um enn eitt "kosningatrikkið" sem V-listinn tekur upp fyrir kosningar. En þar sem Eyjamenn gerðu svo mikið grín að V-lista mönnum fyrir þetta ákváðu þeir að gera eitthvað í sínum málum og byrja að uppfæra síðuna aftur, sem er bara af hinu góða.

Í síðustu grein síðunnar fjallar Jóhann Guðmundsson um grein sem ég birti á eyverjar.is. Þar er hann með mikla útúrsnúninga og segir m.a. að skrýtið sé að ég haldi því fram að "faðirinn skuli standa að því að kæra son sinn". Vísar hann þar til skrifa minna um það að 3 af 6 bréfum Oddar Júlíusson hafi verið send úr faxi í húsi Sjómannafélagsins Jötuns, þar sem faðir Bjössa Ella er með forstöðu. Og fyrir þá sem ekki vita þá er Bjössi Ella stjórnarmaður í Þróunarfélaginu.

Þetta er auðvitað bara hlægilegt. Í fyrsta lagi eru V-lista menn að reyna að koma höggi á Guðjón Hjörleifsson með þessum málum öllum. Þegar V-listinn opinberaði það að þeir væru að hugsa um að kæra málefni félagsins til Efnahagsbrotadeildar þá var þeim tilkynnt það að þá væru þau í raun að kæra Þorstein Sverrisson, fyrrverandi framkvæmdastjóra ÞV, en ekki Guðjón. Ástæðan er sú að hann var ábyrgðarmaður á bókhaldinu og öllu því tengt en Guðjón var einungis stjórnarformaður. Þá kom heldur betur fát á minnihlutann, sem hafði ítrekað lýst yfir miklum stuðningi við Þorstein og ítrekað haldið fram að Þorsteinn væri frábær strákur og hefði unnið mikið og óeigingjarnt starf, sem er alveg fullkomlega rétt. Aðeins þetta eitt sýnir að minnihlutinn, með Lúlla í fararbroddi gerir allt til að reyna að klekkja á Gaua og hans störfum. Þess vegna eru auðvitað bara útúrsnúningar hjá Jóa að segja að ég sé að halda því fram að faðir Bjössa Ella sé að fara að kæra son sinn, því ef þetta verður kært þá er verið að kæra Þorstein og engan annan.

Einnig getur maður spurt sig hreinlega hvort Björn Elíasson sé hreinlega í stjórn ÞV? Ekki vill hann kannast við að hafa verið á fundum þar sem hin ýmsu mál voru samþykkt, t.d. þar sem samþykkt kaup á Skúlason o.fl því tengdu uppá 10 milljónir. Hann virðist vera búinn að gleyma heilmiklu í sambandi við ÞV eða jafnvel neita fyrir að hafa verið á fundum þar sem hann vissulega var. Núna er t.d. verið að vinna í því að fá upptöku af símafundi sem fór fram í stjórn ÞV og Bjössi kannast ekki við að hafa verið á. Mikið sannarlega ætla ég að vona það að þessi upptaka fáist (sem er þó ekki víst að sé hægt, því miður) því þá er svoleiðis hægt að reka þetta allt uppí minnihlutann og hreinlega sanna þær óprúttnu aðferðir sem V-listinn hefur beitt í þessu máli.

Einnig minnist Jói á það að Gaui hafi haldið því leyndu frá því í febrúar 2002 og þangað til í október að mig minnir, að tvær möppur úr bókhaldi ÞV hafi týnst. Í fyrsta lagi hélt hann engu leyndu. Hann beið einungis með því að tilkynna þetta því í fyrsta lagi hófst mikil leit að þessum möppum sem tóku mikinn tíma. Þegar menn áttuðu sig á því að þær fyndust ekki, þá var farið í það að reyna að koma bókhaldinu í lag. Þetta var gríðarlega tímafrek vinna og því frestaði Guðjón að segja frá þessu. Ef menn líta raunsætt á málið, alveg sama hvar í flokki þeir standa, geta menn spurt sig að því að ef ÞÚ myndir lenda í svona svipuðu, myndir ÞÚ þá ekki reyna allt hvað þú gætir til að reyna að bjarga málunum? Það þarf engan snilling til að sjá það að allir myndu bregðast þannig við. Að vera að ásaka menn fyrir að halda svona löguðu leyndu þegar þeir eru í raun að reyna að bjarga málum er auðvitað bara barnaskapur.

Grein skrifuð 3.feb 2003 og birtist á eyverjar.is
Bæjarfulltrúar V-listans daprir með daufa heyrn
Mikið var fyndið það sem gerðist á málefnaþinginu í gær. Eftir miklar og góðar umræður, sérstaklega jarðgöng, þá gat Jóhann Guðmundsson varabæjarfulltrúi ekki stillt sig um að reyna að skjóta á bæjarfulltrúa Sjálfstæðisflokksins sem voru á fundinum, og gera þau tortryggileg, þau Selmu Ragnarsdóttur og Guðjón Hjörleifsson.

Jóhann ætlaði sér svo sannarlega að sýna að Sjálfstæðismenn væru ekki allir þar sem þeir væru séðir, en óhætt er að segja að hann hafi heldur betur skotið sig í fótinn og jafnvel skotið fótinn af hreinlega!

Jóhann sat sinn fyrsta bæjarstjórnarfund síðasta fimmtudag og óska ég honum til hamingju með það. Þar kom hann með tillögu þess efnis að stofna nefnd sem myndi fara með málefni jarðgangna hér á milli og vinna að þeim málum. Samt vissi Jói það (eða ég vona það allavega) að Samgöngunefnd sem var falið af Vestmannaeyjabæ og samgönguyfirvöldum að kanna stöðu samgangna við Eyjar og skoða hvaða úrbætur væru mögulegar, myndi skila af sér skýrslu núna í lok febrúar. Því er hreint með ólíkindum að hann hafi komið með þessa tillögu, sem kom á vægast sagt óheppilegum tíma og lýsir kannski best vinnubrögðum V-listans.

En Jóhann tjáði okkur sem sátu þingið í gær að meirihlutinn í bæjarstjórn hafi hafnað þessari tillögu og ætlaði með því að gera Selmu og Gaua tortryggileg. Hið rétta er að þessari tillögu var vísað til samgöngunefndar Vestmannaeyjabæjar.

Það er hreint með ólíkindum að maður sem hefur greinilega ekki hundsvit á þessum málum, komi með tillögur um þessi mál. Það sem er samt hvað fyndnast við þetta er að hann hélt að tillögunni hefði verið hafnað þegar henni var í raun vísað til nefndarinnar!

Og þar sem Jói var að skjóta á mig á V-lista síðunni að ég hafi ekki verið á síðasta bæjarstjórnarfundi (en ég er því miður alltaf á æfingum á sama tíma og fundirnir eru) þá vil ég nú bara segja eitt:

Það er skárra að mæta ekki á fundina, heldur en að sitja fundina, hvað þá sem bæjarfulltrúi, og vita ekki hvað fór fram á fundinum!

Grein skrifuð 1.feb 2003 og birtist á eyverjar.is
Málefnaþing Ungs fólks tókst vel
Við í Eyverjum héldum málefnaþing ungs fólks í Vestmannaeyjum í gær. Þrátt fyrir mjög slæmt veður þá komu þó rúmlega þrjátíu manns á fundinn sem tókst bara með miklum ágætum. Þeir sem sátu fyrir svörum voru Ingi bæjarstjóri, Elliði Vignis, Selma Ragnars, Erna Ósk og svo ég.

Mikið var rætt um og spjallað en aðallega þó Kaffi- og menningarhús fyrir ungt fólk sem vonandi sér fyrir endann á núna á næstu mánuðum, og jarðgöng.

Einnig var komið inná atvinnumál en eins og flestir vita eru þau ekki uppá það besta í Eyjum í dag. En jarðgöngin voru mest rædd og er alveg nauðsynlegt að við Eyjamenn fylkjum liði og berjumst fyrir því að fá jarðgöng til Eyja sem er ekkert annað en réttlátt, nnars erum við hreinlega ekki samkeppnishæft sveitarfélag. Jarðgöng myndu svo auðvitað tryggja byggð hér í Eyjum það sem eftir væri. Ég ætla að gamni að sýni ykkur sem ekki vita, helstu kosti og galla þess að fá jarðgöng til Eyja.

- Sjúkrahúsið myndi eflast því sjúklingar ofan af Suðurlandi kæmi frekar hingað en að keyra lengri leiðir, t.d. á Selfoss eða Hornafjörð

- Framhaldsskólinn myndi eflast því nemendur af öllu Suðurlandinu stæði þá til boða að koma í skólann á mun styttri tíma en tæki að keyra t.d. á Selfoss eða Hornafjörð.

- Ekkert væri því til fyrirstöðu að við fengjum Íþróttakennaraháskólann sem er nú á Laugarvatni. Eyjarnar eru ein mesta íþróttaparadís á landinu og með tilkomu gangnanna er engin spurning að þessi skóli ætti heima hér.

- Samskip og Eimskip fullyrtu það 1994 að ef jarðgöng kæmu til Eyja þá myndu þeir hafa útskipunarhöfn sína hér í Vestmannaeyjum og keyra svo með allar vörur til Reykjavíkur. Það myndi nefnilega spara þeim svo gríðarlegar fjárhæðir að spara siglinguna frá Eyjum til Reykjavíkur, sem tekur fram og til baka um sólarhring. Þetta myndi þýða fleiri störf og bara gríðarlega góð áhrif á Eyjarnar. Einnig verður að teljast líklegt að þessi risafyrirtæki væru tilbúin að koma að kostnaði vegna gangnanna.

- Talið er að 10 árum eftir að göng muni koma þá verði íbúatalan hér komin í uþb 8500 manns!

- Samkvæmt öllum reiknilíkönum sem liggja að baki áætlaðri umferð um svona göng liggur fyrir að umferðin um göngin yrði um 700-1000 bílar á dag! Inní því eru einnig allir flutningar, en hver trailer og flutningabíll er reiknaður að mig minnir sem tveir bílar.

- Það tekur okkur 2 tíma að komast til Reykjavíkur!

- Ferðamannastraumur hingað myndi margfaldast. Það þýðir að byggja þyrfti fleiri hótel og enn fleiri fá atvinnu í kringum ferðamannaiðnaðinn.

- Hitaveita Suðurnesja sem á núna að mestu, sæstrenginn sem liggur milli lands og Eyja, myndu spara sér fleiri hundruð milljónir í framtíðinni. Þeir gætu nefnilega lagt strenginn í gegnum göngin og myndu losna nánast að öllu leyti við viðhald á honum. Þetta þýðir að jafnvel væri mögulegt að fá þá með í þetta verkefni.

- Bann á veiðum sem er í kringum strenginn, "bannsvæðið" svokallaða, myndi hverfa því strengurinn færi inní göngin. Þetta þýddi mjög mikinn kost fyrir sjómenn hér, aðallega trillusjómenn.

- Öll þjónusta myndi eflast í Eyjum, sjoppur, verslanir og hreinlega allt! Sem þýðir þá fleiri störf!

- Hingað myndum við mjög líklega fá mörg fyrirtæki sem hafa hagsmuni af því að stytta ferðatímann frá Íslandi til Evrópu um sólarhring

- Íþróttir í Eyjum myndu eflast gífurlega. Bylting yrði í aðsókn að golfvellinum, aðallega á sumrin og einnig yrði bylting í öllum íþróttum á Eyjunni.

Þetta eru aðeins nokkur dæmi um þau gríðarlegu áhrif sem göng myndu hafa á búsetu hér en ekki má gleyma því að þetta hefur líka gríðarleg áhrif á allt Suðurkjördæmið, því við værum orðin stærsta þjónustusvæðið allt frá Selfossi til Hafnar í Hornafirði. Eins og við Eyverjar höfum haldið fram í langan tíma og byrjuðum á þessari umræðu: (þótt V-lstinn vilji nú reyndar eigna sér þetta núna en það er eins og annað með þá)

GÖNG TIL EYJA OG EKKERT ANNAÐ!!!

Grein skrifað 22. jan 2003 og birtist á eyverjar.is
Vinnubrögð V-listans fyrir neðan allar hellur!
Alveg er hreint með ólíkindum að fylgjast með vinnubrögðum V-listans varðandi málefni Þróunarfélagsins. Þetta er að verða að hreinum farsa hjá minnihlutanum og ekki skemmtilegum farsa þar sem verið er að ráðast að saklausu fólki og flokkast þetta ekki undir neitt annað en ærumeiðingarn á köflum. Ég ætla að fjalla aðeins meira um málefni Þróunarfélagsins hér seinna en eitt sem ég vill þó segja frá, sem er alveg dæmigert fyrir V-listann.

Eins og flestir vita ákvað félagsmálaráðuneytið að skoða málefni Þróunarfélagsins vegna bréfa sem send voru frá Oddi nokkrum Júlíussyni. Þessi bréf voru 6 talsins. Gögn frá félagsmálaráðuneytinu staðfesta það að 3 bréf af þessum 6, 17. sept, 24. sept. og 31. okt. voru send í faxi til félagsmálaráðuneytisins frá skrifstofu Sjómannafélagsins Jötuns í Vestmannaeyjum, en þar veitir forstöðu Elías Björnsson, faðir Björns Elíassonar sem er fulltrúi V-listans í stjórn Þróunarfélags Vestmanneyja. Þetta staðfestir einfaldlega það að annaðhvort voru bréfin skrifuð af fulltrúum V-listans fyrir Odd eða Oddi stjórnað eins og tuskubrúðu úr höndum fulltrúa V-listans (eins og V-listinn gerir reyndar með fleiri, meira um það síðar) Það skal engin heilvita maður halda því fram að Oddur hafi fengið að senda þessi bréf úr faxinu hjá Ella Björns

Þegar Guðjón Hjörleifsson lagði þetta fram í bæjarráði í gær, varð Lúðvíki Bergvinssyni bæjarfulltrúa V-listans, svo mikið um að hann þurfti heilar 20 mínútur til að svara bókun sem var átta línur að lengd, og var um þetta mál. Meira að segja var hann svo lengi að svara bókuninni að hann mætti seint á annan fund sem var eftir Bæjarráðsfundinum! Þetta segir allt sem segja þarf. En Lúðvík má þó eiga það að hann mætti á Bæjarráðsfund í gær en þeir segja mér fróðari menn að hann sé víst með svo lélega mætingu á Bæjarráðsfundi að ef þetta væri skóli þá væri Lúðvík greyið í úrbótavinnu til að bæta mætinguna sína upp! En hvers er svo sem að vænta af manni sem býr í Reykjavík.
En varðandi þetta mál þá eru þessi vinnubrögð auðvitað með hreinum ólíkindum hjá minnihlutanum og alveg lýsandi dæmi um þessi miður góðu stjórnmálasamtök. Er alveg ótrúlegt hvað þeir ætla að ganga langt með rógburði og ærumeiðingum til þess eins að láta fólk kjósa Lúðvík í stað Guðjóns í Alþingiskosningunum í vor, því það er auðvitað akkúrat það sem málið snýst um. Þetta er meira segja gengið það langt að þetta er farið að bitna á sálarástandi sumra innan V-listans því þeir vita að það sem þeir eru að gera er einfaldlega ekki rétt. Og lygar og ærumeiðingar eru svo sannarlega ekki rétt vinnubrögð. Meira um þetta mál seinna.

Grein skrifuð 7.des 2002 og birtist á eyverjar.is
Til hamingju Gaui og allir Eyjamenn!
Laugardagurinn síðasti verður mér vafalítið minnistæður. Fór ég með Herjólfi um morguninn til að vera viðstaddur þennan líka mikla fund sem átti að vera í Stapanum í Njarðvík. Talið var fyrirfram að þetta yrði þvílíkur átakafundur og hafði ég heyrt setningar eins og "Það verða slagsmál á þessum fundi" og "Takið með ykkur boxhanskana því það á einhver eftir að vera kýldur". Það sem aðallega orsakaði þessi ummæli var sú staðreynd að alþingismaðurinn Kristján Pálsson var ekki á lista uppstillinganefndar. Ég fór því á fundinn með miklar væntingar og held ég að þær hafi staðið undir sér að mestu leyti, nema ég hafði nú vonað að einhver yrði kýldur en því miður varð ekkert úr því. Miklar og langar umræður urðu sem tóku um 4 klukkutíma. Mönnum var heitt í hamsi nokkrum en ekki verður hjá því komist að hrósa Einari nafna mínum Sigurðssyni fyrir frábæra frammistöðu. Nafni minn steig tvisvar í pontu og orð hans voru eins og töluð út úr mínum munni og kæmi það mér ekki á óvart að Einar yrði þingmaður okkar Eyjamanna í framtíðinni. Það var aðeins eitt sem ég varð fyrir miklum vonbrigðum með. Það var Grímur Gíslason. Hann flutti ræðu sem miðaði alls ekki að því að hlúa að hagsmunum okkar Eyjamanna og verð ég að segja að þar fauk allt það álit sem ég hafði á þeim manni, sem var þónokkuð mikið. En eftir allar þessar umræður kom ein breytingartillaga og kom hún frá stuðningsmönnum Kristjáns Pálssonar. Hún fól það í sér að Gaui færi útaf listanum og Kjartan Ólafsson í 3 sætið (var í fjórða) og að lokum Kristján í það fjórða. Okkar maður klikkaði að sjálfsögðu ekki og þrátt fyrir að Árnesingar væru mun fleiri en við í salnum og Reyknesingar auðvitað einnig þá fór svo að Guðjón sigraði Kjartan með 10 atkvæðum í þriðja sætið. Verður það að teljast mikill sigur fyrir Guðjón og er staðfesting á því hve hann er gríðarlega sterkur pólitíkus og ekki síst hve góða stöðu Guðjón hefur innan flokksins. Kristján var svo felldur úr fjórða sætinu af Kjartani og varð því þessi "pólitíski skrípaleikur" hans Kristjáns, eins og nafni minn orðaði það, að engu. Kristján getur bara sjálfum sér um kennt hvernig fór. Ég hefði viljað sjá meiri endurnýjun á fyrstu 5 sætunum en það sem er mikilvægast er að okkar maður Guðjón Hjörleifsson er í góðu sæti og á að vera öruggur á þing. En ekkert er þó öruggt og verðum við Eyjamenn að flykkja okkur á bak við hann. Hann á eftir að gera frábæra hluti, ég er ekki í nokkrum vafa um það. Nú er bara að berjast á móti kosningabaráttu Lúlla og co. sem gengur út á það að reyna að gera allt tortryggilegt sem Gaui hefur komið nálægt sbr. Þróunarfélagið o.fl. Þeir eru svo sem vanir því að haga sínum kosningaáróðri á þennan hátt, sbr. bæjarstjórnarkosningarnar í vor en við tvíeflumst bara við þetta.
Sjáiði til, Gaui á eftir að gera meira fyrir Eyjarnar á einu ári en Lúlli á sínum átta ára þingmannsferli.
Áfram Gaui!

Grein skrifuð 23 maí 2002 og birtist á eyverjar.is
Bæjarfulltrúi V-listans fer með ósannindi
Sú staðreynd blasir við að ef V-listinn nær völdum í Eyjum munu opnunartímar skemmtistaða styttast úr 04:30 eins og hann eru í dag í 03:00 eins og hann var. Mikla athygli vakti viðtal sem var tekið við Guðrúni Erlingsdóttur á Birtunni í gær, en Guðrún er einmitt bæjarfulltrúi V-listans og í 2. sæti á framboðslista flokksins fyrir komandi kosningar. Þar var hún spurð að því hvort eitthvað væri til í því að hún, ásamt bæjarfulltrúum V-listans vildu stytta opnunartíma skemmtistaða og hefðu verið á móti lengingu opnunartíma á sínum tíma. Þar svaraði hún því til að þau hefðu aldrei verið á móti því og þessi umræða hefði aldrei komið upp í bæjarstjórn. Þetta eru hrein og klár ósannindi hjá Guðrúnu því það er til bókun í bæjarstjórn þess efnis að bæjarfulltrúar V-listans og þar með talin Guðrún Erlingsdóttir, hafi hafnað tillögunni um lengingu opnunartíma skemmtistaða á sínum tíma og ætla ég að birta hana hér. Nálgast má þessa fundargerð á www.vestmannaeyjar.is

1298. fundur.
Ár 2001, fimmtudagur 21. júní kl. 17.00 var fundur haldinn í bæjarstjórn Vestmannaeyja í sal Bæjarveitna.

Svohljóðandi tillaga barst: (frá Sjálfstæðisflokknum)
“Leggjum til að eftirfarandi reglur gildi um afgreiðslutíma vínveitingastaða í Vestmannaeyjum afðararnætur laugardaga og sunnudaga og aðfaranætur annara almennra viðurkenndra frídaga eins og tíðkast hefur hingað til.
Lokunartími eigi síðar en…………….kl. 04.30
Veitingasala heimil til………………..kl. 04.30
Tónlist heimil til……………………...kl. 04.00
Rýming gesta í húsnæði vínveitingastaða skal vera lokið kl. 05.00
Reglur þessar gilda til reynslu frá 22. júní til 1. nóvember 2001 og skulu endurskoðast í samráði við sýslumann og víneftirlitsmann í Vestmannaeyjum miðað við gefna reynslu. Í framhaldi af tillögunni verður því beint til sýslumanns, lögreglu og víneftirlitsmanns að fylgja hinum nýju reglum strangt eftir og halda skýrslu um þennan reynslutíma. Tillaga þessi er í samræmi við umsögn sýslumanns og viðræður er tillöguflytjendur hafa átt við sýslumann og víneftirlitsmann.

Guðjón Hjörleifsson (sign.)
Sigrún Inga Sigurgeirsdóttir (sign.)
Hallgrímur Tryggvason (sign.)
Helgi Bragason (sign.)

Guðrún Erlingsdóttir bað um fundarhlé og var það veitt.

Fundi framhaldið.

Tillaga samþykkt með 4. atkvæðum gegn 3.

Svohljóðandi bókun barst:
“Bæjarfulltrúar Vestmannaeyjalistans hafna lengingu opnunartíma vínveitingastaða. Allir vínveitingastaðirnir eru í íbúðabyggð og það eitt, auk margs annars mælir á móti lengri opnunartíma”.

Þorgerður Jóhannsdóttir (sign.)
Guðrún Erlingsdóttir (sign.)
Ragnar Óskarsson (sign.)

Hérna sést greinilega að Guðrún er á fundinum og kvittar gegn lengingu opnunartíma skemmtistaða og fer því með hrein ósannindi í viðtali sínu í gær á Birtunni FM 102,5 og er þetta ekki boðlegt fyrir manneskju sem er í framboði til kosninga.

Við ungt og skemmtanaglatt fólk segi ég: Viljiði virkilega stytta opnunartíma skemmtistaða?

Svarið er NEI! Kjósum því rétt og setjum X við D 25. maí